Ti Nakabutbuteng a Mangdadael

Nasantoan a Mabasa Ita nga Aldaw

Naadaw iti Surat ni San Mateo 24: 1-28

Ipakaammo ni Jesus ti Pannakarba ti Templo
[Mar 13: 1-2; Luc 21: 5-6
Rimmuar ni Jesus iti Templo. Umad-adayon idi umasideg dagiti adalanna tapno ipakitada kenkuana dagiti patakder ti Templo.

"Wen, makitayo amin dagitoy ita," kinunana kadakuada. "Ngem ibagak kadakayo nga awanto ti uray maysa a bato ditoy ti mabati iti yanna, marbanto amin."

Dagiti Rigrigat ken Pannakaidadanes
[Mar 13: 3-13; Luc 27: 7-19
Agtugtugaw ni Jesus idiay Bantay Olivo idi umasideg kenkuana dagiti adalan nga is-isuda. "Ibagam man kadakami no kaanonto a mapasak dagitoy?" sinaludsodda. "Anianto ti pagilasinan iti yaaymo ken iti panungpalan ti lubong?"

"Agannadkayo, ket dikay paallilaw," insungbat ni Jesus. "Agsipud ta adunto ti umay ket aramatendanto ti naganko a kunkunada, 'Siak ni Cristo,' ket adunto ti allilawenda. Mangngegyonto ti kanalbuong ti gubat ken damdamag maipapan iti gubat ngem dikay agdanag. Masapul a mapasamak dagitoy ngem saan pay a daytoy ti panungpalan. Aggugubatto dagiti nasion, kasta met dagiti pagarian. Addanto bisin ken gingined kadagiti nadumaduma a disso. Pangrugian laeng amin dagitoy ti panagsagaba a kas iti panagpasikal ti agpasngay."

"Matiliw ken mayawatkayto a madusa. Mapapataykayto. Guraendakayto dagiti amin a tattao gapu kaniak. Iti dayta a tiempo, adunto ti mangtallikud iti pammatida; aglilinniput ken aggiginnuradanto. Tumaudto ti adu a sinan-profeta a mangyaw-awan iti adu a tao. Gapu iti yaadu ti kinadakes, lumamiisto ti ayat dagiti adu. Ngem maisalakanto ti siasinoman a makaibtur agingga iti panungpalan. Maikasabanto iti intero a lubong ti Naimbag a Damag maipapan iti Pagarian kas pammaneknek dagiti amin a tattao; kalpasanna, umayton ti panungpalan."

[nabulod laeng ti ladawan a naaramat]

Ti Nakabutbuteng a Mangdadael
[Mar 13: 14-23; Luc 21: 20-24]
"Iti kasta, inton makitayo 'Ti Nakabutbuteng a Mangdadael' nga agtakder iti nasantoan a lugar a kas insao ni profeta Daniel, [maawatan koma ti agbasa ti kaipapanan daytoy], masapul a kumamang dagiti adda idiay Judea kedagiti bambantay. Umulog a dagus ti adda iti tuktok ti balay ket saanen a sumrek iti balayna tapno mangala iti uray ania a mabalinna nga itugot. Ti adda iti taltalon saanen nga agawid a mangala iti kagayna. Kadagita nga aldaw. kakaasinto dagiti masikog ken dagiti agpaspasuso. Dawatenyo iti Dios a saan koma nga iti tiempo ti tudtudo wenno Aldaw a Panaginana ti panagpakniyo! Ta kadagita nga aldaw, nakarkaronto nga adayo ti rigat ngem iti aniaman a napasamak manipud pannakaparsua ti lubong agingga kadagitoy nga aldaw. Ket uray kaano awanton ti kastoy a mapasamak. Ngem pinabassit ti Dios ti bilang dagita nga aldaw, ta no saan, awan koma ti makalasat. Ngem gapu kadagiti pinilina a tattao, kissayanna ti bilang dagita nga aldaw."

"Daytoy ti gapuna a no adda agkuna, 'Kitaenyo, adda ditoy ti Cristo!' wenno 'Adda sadiay!' diyo patpatien. Ta agparangto dagiti sinan-cristo ken dagiti sinan-profeta, ket agpakitadanto kadagiti naindaklan a pagilasinan ken nakakaskasdaaw a banag tapno no mabalin, yaw-awanda uray dagiti pinili ti Dios. Denggenyo, impakaammokon kadakayo dagitoy sakbay a mapasamakda."

"Ngarud, no kunada, 'Kitaenyo, adda iti let-ang!' dikay mapmapan. Ket no kunada, 'Kitaenyo, adda nga aglemlemmeng ditoy!' diyo patpatien. Ta umayto ti Anak ti Tao a kas iti kapardas ti kimat nga aggilap iti daya nga agpalaud."

"Sadinoman a yan ti bangkay, idiayto ti pagguurnongan dagiti agila."
.

.

.

. 
Salmo 29: 1-11
Proverbio/Pagsasao 7: 6-23

wwwtaraontibiag.blogspot.com