adda sutil iti kinaulimek ti rabii
di agpakaturog, mariribukan ni elsie;
no kuan agasug iti napalaus sana kuna:
"ay apo, kaasiannak kad,' ala."
ngem itan mangrugin agsalog salun-atna,
mariknanan napalaus a paksuy ken bannogna
no agekhersisio iti kalsada.
desdes ti biag kasta ti turongen
saanen a magawidan inna panagbaket,
iti pitopulo a tawenna adun naparagsakna
iti appokona't tuod, annak, bukod a pamilia.
no kuan kunana latta:
"ay apo, tulongannak kad,' ala."
ngem ti bukodna a pammati
iti mabiit angesnat' inna isubli.
itay kallabes a tawen pinalubosanna
immunan, napanen naginanat' kaingungotna;
namnamaenna met a sumaruno isuna
nakasaganan daytoy a mangyawat kararuana.
"ay apo, ay apo! dimonto kad' ida ikawa
uray awanak dennada, naragsakdanto koma."
masansan a kasta ti kanayon nga idawatna
sakbay a maturog nga agmaymaysa.
di mabayag simmangpet ti pamiliana
manipud abrod intugotda dagiti annakda,
di magawidan liday nagari't kaungganda
makitadat' ina nga awanen angesna.
saan a nagbayag indulindat' bangkayna
piman nga elsie, dakkel a pakalaglagipanda;
kadagiti annak, bannuar ni elsie kadakuada
maitalimeng nga agnanayon iti puso ken panunotda.
.
.
.
.
elsie
rudy ram. rumbaoa
wwwtaraontibiag.blogspot.com
*lagip iti maysa nga ina nga uray nasapa a nabiyuda,
kinabaelanna pay laeng nga insakad narigat a kasasaad
ti biag ti pamilia ken naipaayanna dagiti annakna
iti naraniag a masakbayanda.
hm.kahului.maui
No comments:
Post a Comment