O Apo, asino ti makaaramid iti daytoy?
Ta Sika ti makaipasdek iti amin
Iti lugar nga agtakder ti amin a kararua
Dagiti sasanto ket sadiay ti pagtaengan
Dagiti nadalus ti panagpuspusona,
Sadiay makiddaw ti tampong ti biag.
Aguray ditoy dagiti nabannog
Ken aglulusiaw tapno awatenda ti pigsa,
Ngem aginana ditoy dagiti mapaay
Tapno awatenda ti baro a kired;
Ta isuda ti annak ti Dios nga aginana---
Adda ti kinaragsak nga awan
Patingga ken pagnguddoanna
Ta daytoy ti baro a lubong nga umay.
Ditoy mayarig a pagpunduan
Ken lugar a pakakitaan kadagiti kararua
No sadino a daytoy ti pagsarmingan
Ti Apo a mangukom segun iti inaramid
Tunggal maysa ket dagiti agserbi
A lallaki ken babbai, makitada,
Agdaydayaw ken agrukbabda iti Apo.
Iti palasio ti Ari, agindegda sadiay
Ket makisangoda iti lamisaan ti Apo
Ken ti nagloriaan a kinasirib ti Dios.
Itedna kadakuada ti nakain-inaka
A kinataer ken kinalasbang a pisikal
A langa. Ditoy ti paginanaan
A matawid dagiti agaramid iti kinaimbag,
Awan pagpatinggaanna ta kukuada
Ti maited a gunguna nga agayus
A kas ti gatas ken diro,
Prutas a mangtaraon iti kararua.
.
.
.
.
.
TI BARO A LUBONG NGA UMAY
Rudy Ram. Rumbaoa
wwwtaraontibiag.blogspot.com
#baroalubong #umay #apo #nagloriaan #pagtaengan #nadalus #panagpuspusona #awaten #kired #pigsa #annak #dios #ukom #aramid #agdaydayaw #ari #palasio #tawid #kinaimbag #gunguna #taraontibiag #taraontikararua #ilokodaniw #rudyramrumbaoa
[Nabulod ti ladawan a nausar]
No comments:
Post a Comment