sino ti mangriing ken ni patay ita? ti saan nga agressat
a pannakaibukbok danum-baybay iti labes ti tunggal
nga espada, ti nanglaylayen a mula ken awis kenka
sadiay ti rono dagiti bulong, ti gumilgil-ayab nga apuy,
ken isu amin a langa ti kinadakes. iti garangungong ti angin
makatikaw ti panagtaul ti aso nga adda iti sanguanam
ket mapagbiddutam ti anghel a magmagna iti kalsada.
nasarakak daytoy a sabong ti rosas iti dalan ket kunak:
iti uneg ti sirkulo ti lawag ti pagorasan ti siitan a dios,
itedko kenka, ilatagkot' bagik iti naraber a karuotan---
agdeppaak, agal-alak iti nakabutbuteng, pumaspas
panagbitek pusok, ngem agparintumengak iti sakaanam
tapno dawatek a bay-annak nga agmaymaysa; diak kayat
a masingaka iti kasta unay a panangparparigatmo kaniak.
ngem sino ti mangriing ken ni patay ita? ininumko
ti nangisit a dara iti kopa, nagraniag ti bulan nga awan
nakadlaw; nalabit, saanak a pimmusay ngem nagtubo
ti nakaberberde a mula ti bain-bain iti aglawlaw,
dagiti siitan a kayo ken itutupuar ti agsilud nga insekto---
ti nangrugian ti maysa nga abut nga awan pakausaranna,
rimmubrob ti apuy ket madarang iti bara ti kasta unay
dagiti magna iti dayta a dalan; agikkis ken agsangitda
iti napalalo ngem agpusaksak ti rupa ken maay-ayatan
ti demonio ket naggudua ti nakuridemdem a lawag ti bulan.
.
.
.
.
.
sino ti mangriing ken ni patay ita?
rudy ram. rumbaoa
wwwtaraontibiag.blogspot.com
cr o7.2o12
[nabulod ti ladawan a nausar]
#ilokodaniw #mangriing #patay #taraontibiag #rudyramrumbaoa
