Ayaban ni Jesus ni Levi

Nasantoan a Mabasa:
Pebrero 11-17, 2013

Pebrero 11, 2013 [Lunes]
Maika-42 iti 365 nga Aldaw ti Tawen
Exodus 32
Exodus 33
Mateo 26: 69-75
Mateo 27: 1-14
Salmo 33: 1-11
Proverbio 8: 33-36

Pebrero 12, 2013 [Martes]
Maika-43 iti 365 nga Aldaw ti Tawen
Exodus 34
Exodus 35: 1-9
Mateo 27: 15-31
Salmo 33: 12-22
Proverbio 9: 1-6

Pebrero 13, 2013 [Mierkules]
Maika-44 iti 365 nga Aldaw ti Tawen
Exodus 35: 10-35
Exodus 36
Mateo 27: 32-66
Salmo 34: 1-10
Proverbio 9: 7-8

Pebrero 14, 2013 [Huebes]
Maika-45 iti 365 nga Aldaw ti Tawen
Exodus 37
Exodus 38
Mateo 28
Salmo 34: 11-22
Proverbio 9: 9-10

Pebrero 15, 2013 [Biernes]
Maika-46 iti 365 nga Aldaw ti Tawen
Exodus 39
Exodus 40
Marcos 1: 1-28
Salmo 35: 1-16
Proverbio 9: 11-12

Pebrero 16, 2013 [Sabado]
Maika-47 iti 365 nga Aldaw ti Tawen
Leviticus 1
Leviticus 2
Leviticus 3
Marcos 1: 29-45
Marcos 2: 1-12
Salmo 35: 17-28
Proverbio 9: 13-18

[Nabulod laeng ti ladawan a naaramat]

Nasantoan a Mabasa Ita nga Aldaw, Pebrero 17, 2013, Domingo
Maika-48 iti 365 nga Aldaw ti Tawen
Leviticus 4
Leviticus 5
Marcos 2: 13-28
Marcos 3; 1-6

Ayaban ni Jesus ni Levi
[Mat 9: 9-13; Luc 5: 27-32]
-Nagsubli manen ni Jesus iti igid ti Dan-aw ti Galilea. Napan kenkuana ti adu a tattao ket insurona ida. Idi magmagna, nakitana ti maysa nga agsingsingir iti buis, ni Levi nga anak ni Alfeo. Agtugtugaw ni Levi iti ofisinana a pagbayadan iti buis. "Surotennak," kinuna ni Jesus. Timmakder ni Levi ket simmurot kenkuana.

Idi mangmangan ni Jesus iti balay ni Levi, nakilanglang kenkuana ken kadagiti adalanna ti adu nga agsingsingir iti buis ken managbasol; ta adu dagiti simmurot kenkuana. Adda sumagmamano a mamaestro iti Linteg a kamkameng ti grupo dagiti Fariseo. Idi nakitada a makipangpangan ni Jesus kadagiti managbasol ken agsingsingir iti buis, sinaludsodda kadagiti adalanna, "Apay a kalanglangna dagiti agsingsingir iti buis ken dagiti managbasol?"

Nangngeg ida ni Jesus ket kinunana: "Saan a dagiti nasalun-at ti makasapul iti mangngagas, no di ket dagiti masaksakit. Diak immay mangayab kadagiti nalinteg, ngem immayak a mangayab kadagiti managbasol."

Ti Saludsod maipapan iti Panagayunar
[Mat 9: 14-17; Luc 5: 33-39]
-Iti naminsan, agay-ayunar dagiti adalan ni Juan a Mammuniag ken dagiti Fariseo.

"Apay nga agayunar dagiti adalan ni Juan a Mammuniag ken dagiti adalan dagiti Fariseo, ngem dagiti adalam, saan?" napan sinaludsod ti sumagmamano a tattao ken Jesus.

Simmungbat ni Jesus, "Mabalin aya a di mangan dagiti makiboda no adda ti nobio iti arpadda? Saan a mabalin! Saanda nga agayunar no adda ti nobio iti sidongda. Ngem dumtengto ti tiempo a maipanaw ti nobio kadakuada; isunton ti panagayunarda.

Awan mangitakup iti baro a lupot iti daan a pagan-anay. No maaramid ti kasta, kumsento ti naitakup ket dumakkel ti pigis ti pagan-anay. Awan met ti mangikabil iti baro nga arak iti daan a supot a lalat. No maaramid ti kasta, ti arak bettakenna ti supot ket agpadada a madadael. Saan! Ikarga ti baro nga arak iti baro a supot a lalat!"

Ti Saludsod maipapan iti Aldaw a Panaginana
[Mateo 12: 1-8; Luc 6: 1-5]
-Iti maysa nga Aldaw a Panaginana, magmagna ni Jesus ken dagiti adalanna iti kataltalonan a namulaan iti trigo. Bayat ti pannagnada, nagruros dagiti adalanna kadagiti dawa ti trigo.

Napaliiw daytoy dagiti gariseo ket sinaludsodda ken Jesus. "Kitaem, apay nga ar-aramiden dagiti adalam ti saan a maipalubos iti Aldaw a Panaginana?"

"Diyo pay aya nabasa ti inaramid ni David idi mabisin, kasta met dagiti kinakuyogna?" insungbat ni Jesus. "Simrek ni David iti balay ti DIos sa nangan iti tinapay a naidaton iti Dios. Napasamak daytoy idi ni Abiatar ti Kangatoan a Padi. Iti paglintegantayo, dagiti laeng papadi ti mapalubosan a mangan iti dayta a tinapay. Ngem nangan ni David ket inikkanna met dagiti kakaduana.

Naaramid iti Aldaw a Panaginana a pagimbagan ti tao; saan a naaramid ti tao nga agpaay iti Aldaw a Panaginana. Ngarud, ti Anak ti Tao isu ti Apo uray pay iti Aldaw a Panaginana," inggibus ni Jesus.

Ti Lalaki a Paralitiko ti Imana
[Mat 12: 9-14; Luc 6: 6-11]
-Iti naminsan nga ipapan manen ni Jesus iti sinagoga, adda lalaki sadiay a paralitiko ti maysa nga imana. Adda tattao a mangpalpaliiw ken Jesus no pagimbagenna ti lalaki iti Aldaw a Panaginana tapno adda pangpabasolanda kenkuana.

"Umayka ditoy sango," kinuna ni Jesus iti lalaki.

Ket sinaludsodna kadagiti tattao: "Ania ti ipalubos ti Linteg nga aramidentayo iti Aldaw a Panaginana? Tumulong wenno mangranggas? Mangispal iti tao wenno mangpatay?"

Ngem nagulimekda.

Sipupungtot ni Jesus a nangiwaras iti panagkitana kadakuada; nupay kasta, inay-ayna ida gapu iti kinatangken ti uloda.

"Unnatem ta imam," kinunana iti lalaki.

Inunnat ti lalaki ti imana ket immimbag.

Rimmuar dagiti Fariseo iti sinagoga. Nakiumanda a dagus kadagiti pasurot ni Herodes. Nagtutulaganda no kasano ti panangpatayda ken Jesus.

Salmo 36: 1-12
Proverbio 10: 1-2